أذكـــــى شعوب العالم
بسم الله الرحمن الرحيم
انا الحقيقة مكنتش مصدق وانا بشوف الفيديو ده و اللى بيثبت بالفعل ان الامريكان ……….. هم أذكى شعوب العالم
الفلانتينو … إهداء غالى من العزيز الغالى كبوووده
جالي يوم الاربع كمية مكالمات كتير جدا ورسايل بتهنيني بالفلانتين داي لدرجه اني ظنيت انه عيد ميلادي الحقيقي .. الحقيقه اني لاول وهله مفهمتش هما عاوزين ايه وهل ده حاجة كدا زي مولد ابن تميم عندنا في المنزله وبيبقي فيه ترمس وحمص ومراجيح بقياده المبدع حلاوة السيد والمايسترو حماده دلعني واوعي توقعني ؟
بس بعد شويه أسئله لاصحاب المكالمات دي اللي كان منهم بيقفل في وشي لاني دخلت في منطقه حدود وناقص يقولي “يافاسق ياللي مبتعرفش”.. ومنهم اللي كان بيضحك كانه بيكلم اسماعيل يس ومنهم اللي كان بيتقرع في وشي ويقفل برده , بس في النهايه قالولي انه عيد الحبيبه .. والحبيبه يااصدقائي مصطلح مصري مرتبط بالكورنيش في المعادي وشارع البحر في المنصورة والصينيه في الجامعة ومرتبط بالذرة واللب وحب العزيز وغالبا بتبقي مرحله قبل ماكل واحد فيهم يتجوز حد تاني بقي ! أو يتجوزوا بعض وده مبيحصلش كتير..
ولو حصل بقي تلاقي العروسه يوم فرحها لابسه الفستان الابيض فرحانه انها ختمت مشوارها الحبيبي ببطوله واخدت احسن لعيبه في بطوله “سبع البرومبه حيث لكل راجل زومبه”…
وتلاقي العريس طبعا لابس البدله السوده حداد علي حاجات كتير ضاعت وحاجات كتير لسه هتضيع ان شاء الله فسح …. فلوس …. طموح …….. يااااه كانت ايام حلوة والله , يلا ولا دايم الا وجه الله!!!
قلت بقي اعمل واد بقي صايع كدا واكلم واحد صاحبي اهنيه بالفلانتينو وبعد عناء قام من النوم ورد عليا قلتله ازيك ياواد “هابي فلانتييييين” .. الواد ده بقي وهو قايم من النوم بيبقي عمليه ال send عنده هي اللي شغاله بس اما الreceive وال analyze
بتبقي مشلوله الي حد كبير
قالي ايه؟؟؟ قولتله بكل برود “هابي فلانتييييييييين” قالي اما انت انسان غلس صحيح مصحيني الساعه 4 الفجرعشان تقولي happy birthday وبعدين النهارده تقريبا مش عيد ميلادي اصلا … قلتله ياعم عيد ميلاد ايه بس دلوقتي ؟؟ بقولك هابي فلانتين يازفت قالي آآآآآه هو وصلك ماشي ياخويا happy pregnant وقام اتاوب في وشي وساب الخط مفتوح وسمعت خخخخخخخخ….سسسسسس…..فوووووو قلت برجنانت ايه ياابن ال … شايفني في االشهر التاسع ولا الواد بيأوأ علي ايدي عاوز الرضعه ؟؟
ياربنا مفيش حد يسمعني اغلس علي مين دلوقتي في الساعه الخميسه دي ؟؟؟
كلمت احد البارعين في فنون الحب والحبيبه وسالته عن ايه الموضوع ؟؟ بعد لما هنأني بصوت كله حب وحنان لدرجه اني حسيت اني بكلم اسامه منير .. قالي يابيدو ياحبيبي الحب ده شئ جميل اتنين يقابلوا بعض يتكلموا بالعيون (تاتاتاتا).. بالرموش (تي تي تي )… بالقلوب (تربتا تي) .. انا بقي نايم وبطوح رجليا في الهوا وباكل جزرة من التلاجه واقوله وايه كمان .. قالي في عيد الحب بقي بنتجمع كلنا ونخلي الدنيا حب . الشمس مش بتطلع يومها اللي بيطلع حب … قلتله يافضيحتي ده انا معيش ساعه وبعرف ميعاد الشغل بالشمس هروح الشغل ازاي دلوقتي؟ اقولك مش مشكله بكره اجازة تضامنا مع اخوانا المختله في الاراضي المحتله ؟؟؟
قالي لأ يأخي انا اقصد ان من كتر حبنا الشمس بتقلدنا وتتمشي مع القمر بليل وتيجي لنا الصبح بقي تطلعه علينا وتطلع قلوب قلوب تغطينا.. تغطينا.. تغطينا… (هاني شاكر في حوار مع بطانيه الجزء التالت)…
واذ بي فجأه بصووتله في التلفون .. فين الجزرة؟؟ … قالي جزرة ؟؟ قلتله اه اصل قمت اشرب وسبت الجزرة رجعت ملقتهاش … قالي (جزء من مسرحيه السافل يتحدث)…….
قلتله كمل كمل ياحليم قطعت قلبي يخربيت اللي يزعلك
استني بس اقوم اجيب جزرة تانيه .. قالي جزر جزر جزر حاسس اني بكلم ارنب قلتله بلاها جزر هقوم اجيب طمطمايه واجي …
صاحبنا قالي ان من الطقوس ان البنت تجيب للواد دبدوبه بمبي والولد يجيب دبدوبه حمراااا للبنت ..
وهو بيحكي بدأت دموعي تفر علي خدي معقوله ده كله يحصل ؟؟ الجزرة تضيع مسافه مروح المطبخ وارجع !! دي كانت اخر واحده في التلاجه !!! الخاينه ممكن تكون هربت مع ارنب في عيد الحب السافل ضحك عليها وغواها …
انهينا المكالمه وعرفت حاجات كتير عن الفلانتينو داي وبقيت شبه متأكد انه اختراع نسائي لان التكوين الفسيلوجي للست بيخليها تفكرازاي تخلي الراجل يضيع فلوسه ع الحاجات الهايفه دباديب وورد بلدي وهي عارفه ان الراجل في الفتره دي بيبقي هيمان كإنسان الغابه وبيشاركها الهيافه النص بالنص …
وقبل الجواز الاتنين يسمعوا حماده هلال ” كان بينا حب كان فيه مشاعر كان فيه صراحه وعمره ما كان فيه كدب”..
بعد الجواز يسمعوا برده حماده هلال “كان بينا قسم كان فيه مشاكل بينا كمان وكان فيه ضرب ليه كل حاجة بينا جيرانا تسمعها ليه كل فاظه غليا بقت نوقعها”…
بس عاوز اقولكم اني كــكبـــوده نظرتي اختلفت تماما للون الاحمر حبيت ريدهات بعد اليوم ده وبقيت ببص للبانر بتاع ريدهات الكبير الاحمر فوق السرير علطول وكان احساسي بيه مختلف عن كل مره احساس بالانتماء .. بالفخر .. بحسن شحاته (ابو كريم يابو كريم يابو كريم) …احساس بالفلانتين (عقيمه يامصر)..
